“Ik eb oe al ad” zeg Jenny teegn mien. Z’ef de beste wensn al egeum. Allo, wi’j bin toch een ende varder now en met wat anders bezig? De buurn bin veur een afskeidsfesien van de dominee uut’eneudigd. Ei ef een nei baantien in Kurréja op’eskarreld. Op zien leeftied kuj doar oe pette veur ofneemm, aj d’r ene em. Ja ja, Chapeau!
Meteen een mooie geleegneid um in stimmeleernd gesprek te koomm. Et kan niet uutbliemm det et over Frankriek giet en wie ze doar over’oop eskeutn em. Det giet oe, ondanks det wi’j tachentig joar lank met det stellegien in de maag ‘ezeetn em, toch an ’t árte. Ie oem d’r gien Fransman veur te weezn um de skok deur te loatn dreunn. Haprupt vuul ie oe stark verbundn en prebeern weer ies Frans te proatn. Gait zeg det ie maggies veule Franse woordn eleert ef en stek van wal: “Bureau, parapluie, portemonnaie en pipe”
Dark met zien vuus te brede glimlach, deed ook een flinke duut in‘t zákkien en zee: “decolleté, corselet, directoir en charreteln” Et was duudelijk det Dark met lingerie de Français bezig was en Theo skruk em toch wel een bietien en dacht: ‘now mut ik zurgn det et ier niet de verkeerde kant op giet en ordinair wurd. Kuj niet maakn.’ Olde tuttebolle.
“Bi’j ons in uus dut Siep alles met de Franse slag” zeg ie. Ik zol em zo wel de lollige ‘oek weer in willn skuppm, maar ’t ekke was van de dam. “Kuj wel an de gedienn zien!” zeg Truus eel charmant, met een glasien sudderans in d’and. “Det was mien ook al op’evalln” zeg Greet autoritair, fikse ladink rouge en de krummels van de quiche nog in de mond’uukies “kuj ze soams niet wat netter dichte doen Siep?”
Ik krieg een hellendig gevuul van Déjà vu. Ten eerste, bin ik niet de gene die de gedienn dichte dut. Ten tweede, bin ze veulst te lank en ten darde zit ik liever an mien bureau met een croissantien en een groot glas dreuge Chateau Migraine, dan det ik met een goeie indruk van mien façade bezig bin. Et is toch wel eel frappant det z’oe in de gaatn oln en d’r een bepoalde gedienn-etiquette in disse buurt bestiet. Ze bin in elk geval met zien alln met een dikke portefullie neur d’opticien ewest.
De troubadours Gait en Dark, em noa et faillissement besleutn um met de capuchon op, quattre mains op ‘t urgel van de dominee te speuln. Bi’j et montere repertoire van zullie en et lied; ‘non, je ne regrette rien’ kump Louise, de enthousiaste femme fatale, in de beenn en nemp revanche. Een wolk van zuutige parfum dwarrelt deur de kamer ene en d’een noa d’ander marcheert in trance d’r achteran. De polonaise giet et ele interieur deur. De dominee bekeern ons met gluuinde bouillon van kikkerbillegies. “Ej al wat ad? ” vrug Jenny, …. ze prut weer teegn mien! “Ja ja, magnifique” zeg ik. “Wat zej now?” vrug ze. “Eem neur toilet!” ….Dove quartelle.
Ie weetn wel wie as d’r now thuus de gedienn met een paar punaises dichte dut eh? Ei ef et over de chantage van d’economie. Mooi zien gang loatn goan. Siep dut de haute couture van de Marche de Cercle uut, ….voila en is bli’j det ze gien Lits Jumeaux ef. Now, vannacht vast weer sabotage van Les Miserables en Timie gewoon Je Maintiendrai (in oe mandtien drei’jn)
Cést la vie.
Now, adieu eh.
TUSS’NDEURTIEN
