“VEERTIG DAAGN”
Veertig daagn veur Paosn um oe zelf ies goed deur menander te skuddn. ‘Tot bezinnings koomm’ iet det, eem over et leem noa denkn. Vastn oef ik niet te doen, dan blef er elemoale niks meer van mien over. Bliekbaar giet et doar ook niet umme. Wie ef d’r wat an as ik een paar daagn gien vleis ete? Toch allenig ak det geld, wat ak veur et vleis uut zol geem, in ‘t een of andere pöttien drukke. De ene ef warkelik niet genog, en d’ander ef vuus te veule.
Ik goa mien zelf maar noa, al die frutselties um mien ene, et meerndeel ek aggies niet neudig maar met de tied krieg ie een ele verzamelink van al oe overleedn omes en tantes. Ie dorvn et niet noar de kringloop te doen, veur ’t geval det de dooin oe achternoa skriwwn. In oe euft. Ie kenn det wel, zo van: ‘bin ie now elemoale, ie mossn det toch zo neudig em, now mut et an de kante.’
In elk geval kan et ier en doar best wel wat minder.
Ik zol mien tillevisietied ook wel an wat anders kunn spandeern en ies eempies bi-j mien olde buurman langes goan.
En eh, in plaas van elke dag op Feesboek zittn te loern, muk ies een paar daagn oversloan. Want uuteindelik is et eindeloos, et giet maar deur. Ie loatn van alles zien, en ie kiekn oe skeels an wat anderen er allemoale opzettn en veral wat ze te verteln em.
Weet ie, ie kunn zelfs nog ruzie kriegn ook, want et is makkelik umme et bi-j et verkeerde ende te kriegn. Aj bevobbeld: “hahaha” skriem, kan et bi-j een ander in ‘t verkeerde keelgat skietn. Bemuuit oe niet met de gesprekkn van dardn, vriendn van vriendn die aj nog nooit leemd ezien em. Doar em ze vierkant de skorft an.
Wist ik veule det ze ’t elemoale niet lollig beduuln en et een arnstige vroage was. Zo iemand wil dan ook sirrejeus hantwoord em en niet daj in de lach skietn, ook as et stomweg op Feesboek is en ie allenig maar: “hahaha” zeggn, kuj niet maakn. Ie skrikkn wel eem aj iemand ellig maakn, maar ja. Zelfs bi-j de gemeenteroadsleedn ej det wel ies, (partij ef drie letters) dan zie’j et een en weer goan, de vonkn skietn d’r of en ie denkn; ‘man man, ….olt oe toch een bietien gedijsd, ze zittn oe op de káste te jaagn met die olde beklodderde bunkert’.
Dus, in de tied dat ik NIET op Feesboek zit, muk echt wat anders goan verzinn, weur as een ander wat an ef. Maar kan ik det ook 40 daagn lange vol oln. Of bin ik toch een bietien verslaafd, of misskien wel zo arg da’k er niet meer buutn kan. Da’k vuul eerder an de computer denke dan an de klokke die as angef wanneer de koffie in-eskunkn mut wurn! Now, en anders rup er wel ene vanuut de obbiekamer,….umsko. Deur kuj gif op inneemm.
In de zunne middeteern over de betekenis van Poasn, kienders elk jeur kump et weer langes en goa ‘k de diepte in. Dus allo, …..een bietien minder…… en dan van ‘t andere wat meer.
Aju lui
TUSS’NDEURTIEN
P.S. Aj niks op Feesboek zien, …..zit ik tot Poasn in de zunne!
